熊觀：一維的分析文章

唔知係咪本熊年紀越大，漸漸變成咗個忿怒中年，見到一啲事情會無名火起 (啲句後加：還有火即係唔化，唔化也是青少年特徵之一，也許實情係本熊正在逆齡生長)

事情係本熊剛剛睇咗一篇「分析」文章足足三次，要睇三次嘅原因係本熊想確認自己究竟睇咗啲乜嘢，最後結論成為咗今天文首標題。

文章內容大意係政府出咗個經濟數據，監管機構個解讀係咁樣；市場反應暫時係咁樣；市場人士A覺得咁樣；但市場人士B又有相反意見。個個都好似有啲道理，最重要監管機構會唔會錯呢？佢錯咗好大獲㗎喎！最後大家都係繼續觀察，繼續密切留意啦，多謝大家，多謝稿費。

作為讀者除了得到密切留意啲個結論，究竟從文章得到甚麼呢？究竟文章係一直引述，又做咗啲乜嘢分析呢？本熊一直思考着。

作為讀者本熊想「分析」文章有：

1. 主提

凡文章有主提，主提通常由定義開始。例如... 只是例如... 講美國通脹數據：居民消費價格指數CPI，有分普通CPI 同核心CPI，後者剔除了食品和能源對於價格嘅影響。咁點解要分開睇呢？對於反映民眾生活成本邊個重要啲呢？美聯儲嘅政策以邊個為導向呢？只有確立嘅定義，才可能有正確嘅推論。

2. 內容

是次CPI 上升了幾多幾多巴仙，咁即係反映咗啲乜呢？同在社會生活的你我他，感受可以完全不同。要理解CPI 反映咗啲乜，一定要從其組成部分著手。就普通CPI 而言，佔絕對大頭係住房 (42.1%)，跟著係交通 (16.9%)，其次係食品 (15.4%)，還有醫療、教育、娛樂等等。咁今期CPI 上升邊個分部貢獻最大呢？黎緊邊個分部有上升苗頭呢？

就CPI 係短期還是長期現象，從不同分部可否看出端倪？其中租金舊年有豁免政策喎，今年還有嗎？二手車貴咗好多喎，demand 大咗喎，因為一手車無貨？supply 又細咗喎，因為車主無錢換車繼續用舊車？又出外餐飲貴咗喎，目前係一日三餐，黎緊會否一日七餐？這些因素可以統稱為supply shock 嗎？又pandemics 導致supply shock 還是demand shock 呢？黎緊完了嗎如無意外？

3. 比較

就CPI 而言可以有甚麼參照對象呢？政府公報嘅CPI 係統計出來的，統計出來即是已發生的事情啦；咁預期通脹率 (expected inflation rate) 又點得來呢？其中一個重要涵數：抗通膨債券TIPS 利率係市場用錢投番黎喎，又近似的短中長期國債利率又點取捨呢？

股票市場會對已發生的事情反應大啲？還是對將來的預期反應大啲？用口講嘅嘢可信啲？還是用錢落嘅注碼可信啲？

若文章內容東講一個點、西講一個點，水平只是停留在一維階段；若成功將東西比較，可以視為二維水平；惟有透過築起結構，像有齊長、闊、高等元素 (加上時間軸) 才能成為一個「立體」三維的存在，分析問題才可能透徹，才可能建立自己的「角度」不再人云亦云。

就CPI 數據的解說，監管機構看重「長」的一方、市場人士A覺得「闊」重要些、市場人士B認為「高」才是可取，究其「觀點」的不同，也未必是mutually exclusive 的。只是「坐標」位置不同，看事物的角度也有不同罷了，更重要是其背後所代表的「利益」才可能是一切解說的關鍵。